L Cuncors de ideies per la trasfurmazion dla fassada dl Palaz di Ufizies finanzieres
Do dejeneies de stritoc sun la cunservazion o desdruzion di monumënc fascisc ti à l Minister talian per la Cultura Sandro Bondi ai 25 de jené 2011 scrit na lëtra al Presidënt dla Jonta provinziela de Bulsan Luis Durnwalder, cun chëla che l ti à segurà che, n ucajion dla dertureda dl Monumënt ala Vitoria, se ëssen cruzià de fé n ntervënt de tlarimënt sun la storia de chëla opra, tulan ite nce la istituzions locales. Na soluzion semienta, baseda sun la cunlaurazion istituzionela, fova nce unida pruspeteda per l Monumënt al Alpin de Burnech y per i trëi ossares de Burgeis, Gossensaß y Sanciana. Sun l relief dl palaz di Ufizies finanzieres se nmaginoven ntervënc de mpat particuler.
Bele ai 2 de fauré dl 2011 ova la Jonta provinziela de Bulsan scrit ora n cuncors de ideies per la trasfurmazion dla fassada dla frabica. L cuncors fova adressà a duc “i artisc y a duta l’artistes, ai architec y al’architettes, ai storics y ala storiches y ai/ala operadëures de cultura”. La soluzion per la fassada dassova trasfurmé l relief te na “luegia de lecurdanza”, nsci da ne vester “nia plu da udëi diretamënter ma azessibla per na vijita cuscienta y cumenteda a na maniera adateda tres tesc de spligazion”. La ideies y i proiec pudova unì prejentei te na forma liedia y dassova preudëi n dialogh architetonich y artistich cun la frabica nstëssa y cun duta la plaza dla Sunieria. D’autri criteres de valutazion tulova n cunscidrazion la criatività, la realisabltà y la cualità dla nfurmazion storica. Per la valutazion di proiec iel unì istituì na cumiscion aposta.
La partezipazion al cuncors fova scialdi granda. L ie defati unì prejentà de ndut 486 proiec. Da chisc iel unì cris ora cin proiec, prims ex aequo, danter chisc chël di artisc de Gherdëina Arnold Holzknecht y Michele Bernardi, che n à ulù realisé cun vel’ mudazion y ntegrazion.

Download
2011 Concorso di Idee - Descizione dei progetti.pdf
2011 Concorso di Idee - Rilievo dei progetti.pdf