L RELIEF MONUMENTEL A BULSAN:    
DA HANS PIFFRADER A HANNAH ARENDT

PARADOS DE HANNAH ARENDT

La frasa de Hannah Arendt
L’aplicazion, dan l relief, de na frasa de Hannah Arendt (“Kein Mensch hat das Recht zu gehorchen – Nessuno ha il diritto di obbedire – Deguni ne à l dërt de ulghé”) mira a mustré te na maniera tlera che l ie unì fat na reflescion da pert dla sozietà zevila sun l’opra n cuestion. L ntervënt uel storisé l lëur de Piffrader ti metan sëuravia elemënc nueves che contrabalanzëie i cuntenuc ideologics stersc, cundensei tla reprejentazion de Mussolini a ciaval y tla scrita fascista “crëier, ulghé, cumbater”.
Hannah Arendt (1906–1975) ie stata una dla figures nteletueles plu mpurtantes dl Nuefcënt. Filosofa, storica y politologa tudëscia de urigin judiera, iela unida sfurzeda a emigré ti Stac Unic do che l fova unì su l nazism. Dl 1951 iela deventeda zitadina americana. Tl medemo ann àla publicà a New York n liber per nglëisc dal titul “La urigins dl totalitarism”, che ie ncueicundì n tlassich tl ciamp dla nrescides sun la genesa di guvierns totaliteres dl nuefcënt, de chëi che la mët tla lum i aspec de razism y genozid, l antisemitism, l imperialism, la cancelazion dla lidëza, la propaganda y, n ultima, la dejumanità.
La zitazion n cuestion ie unida proniunzieda da Arendt te na ntervista tl radio dl 9 de nuvëmber 1964 cun Joachim C. Fest, n ucajion de chëla che la filosofa à dit testualmënter: “Kein Mensch hat bei Kant das Recht zu gehorchen” (“Secondo Kant nessuno ha il diritto di obbedire” o “Deguni ne à, a dì de Kant, l dërt de ulghé”). Nsci ulova Hannah Arendt rebater a chëla “banalità dl mel” che la ova usservà tla figura dl nazist Adolf Eichmann, sun chël che la ova n ucajion dl pruzes a Gerusalem publicà n articul dal medemo titul. Contra la giustificazion de truep nazisc d’avëi mé fat “cie che ti fova unì cumandà” y contra l tentatif de Eichmann de se refé nchinamei al imperatif categorich de Kant per giustifiché si cumpurtamënt, nen sfauzan defin l senificat, sotrissova Arendt l duvier etich individuel de messei se paré contra la tentazion totalitera, de refudé i ordenns ngiusc y de vester cuscienc dla fazions dl’azions che n fej.

Hannah Arendt
Da Wikimedia Commons, the free media repository